جمعیت اہل حدیث کے عقیدہ اور اس کی تشریح کی روشنی میں ہم یہ کہہ سکتے ہیں کہ اہل حدیث کی دعوت توحید رب العالمین کی دعوت ہے۔ اس لیے کہ یہ اسی توحید کی دعوت دیتے ہیں جس کے لیے تمام انبیاء کرام علیم کی بعثت ہوئی اور تمام صحف سماویہ کا نزول ہوا۔اہل حدیث کی دعوت اتباع سنت کی دعوت ہے۔ اس لیے کہ زندگی کے تمام معاملات میں اور بالخصوص عبادات میں حتی الامکان سنت مطہرہ کی پابندی کی کوشش کرتے ہیں۔

اہل حدیث کی دعوت ایک سلفی دعوت ہے۔ اس لیے کہ یہ اسلام کی اس پاک و صاف سلف صالحین نے امت کے سامنے پیش کی صاف اور سادہ تعلیم کی طرف دعوت دیتے ہیں جوسلف صالحین نے امت کے سامنے پیش کی۔اور جو ہر قسم کی بدعات اور رسوم سے پاک اور منزہ تھی۔ اہل حدیث کی دعوت ایک حقیقی تصوف کی دعوت ہے۔ اس لیے کہ ان کے نزدیک تزکیہ نفس، طہارت قلب اور حق سبحانہ و تعالیٰ کی محبت تمام معتقدات اور اعمال صالحہ کی بنیاد ہے۔

اہل حدیث کی دعوت ایک سیاسی دعوت ہے۔ اس لیے کہ وہ حکومت سے اسلامی معاشرہ کی اصلاح، دینی تعلیم کے اجراء و استحکام اور اسلامی نظام حکومت کے قیام کا مطالبہ اور اس کے لیے کوشش اور جدو جہد کرتے ہیں اور بیرون ملک اور دوسرے اسلامی ممالک کی مسلمانوں کے ساتھ اخوت اسلامی کے رابطہ کو مستحکم بنانے کے لیے ساعی اور کوشاں ہیں۔